Heilsukorn

3 markmið WHO heilsudagsins 7.april

Samkvæmt vefsíðu Alþjóðaheilbrigðismálastofnunarinnar (WHO eru þjóðir heims beðnar í tilefni af alþjóðlegum heilsudegi 7.apríl 2016 að gera átak til að fyrirbyggja fjölgun  á tilfellum af sykursýki 2 (Diabetes) með að setja sér eftirfarandi þrjú markmið:

-Auka vitundavakningu um byrði og afleiðingar þessa alvarlega heilbrigðisvandamáls fyrir einstaklinga og samfélagið

-Skipuleggja og framkvæma  ákveðin skref til að fyrirbyggja sjúkdóminn til að draga úr þessum faraldri, greina hann á byrjunarstigi og meðhöndla þá sem greindir hafa verið

-Taka þátt í framkvæmd fyrstu alþjóðlegu upplýsingasöfnun og greinagerð um sykursýki og vera talsmenn sterkara heilbrigðiskerfis sem leggur áherslu á fyrirbyggjandi aðgerðir og tryggir betra eftirlit sem skilar árangursríkri stjórnun þessa langvarandi sjúkdóms

 

Talið er að 1 af 3 hafi sykursýki 2 og jafnvel án þess að vita það. Sykursýki II er í flestum tilfellum áunnið heilsufarsvandamál sem hefur farið vaxandi hér á landi líkt og annars staðar í hinum vestræna heimi. Sykursýki af tegund 2 er talin vera faraldur 21. aldarinnar. Vilt þú taka þátt í að snúa þessari þróun við?  

Allir eru hvattir til að efla forvarnir gegn sykursýki. Best er að byrja á sjálfum sér, vera meðvitaður um áhættuþætti sykursýki II og velja holla lífshætti. Gott er að ræða um heilsuna við fjölskyldu og vini og hafa heilsueflandi áhrif á umhverfið, „smita“ fólk með hollum venjum.


Fimm ráð til að fyrirbyggja sykursýki

1. Auka hreyfingu og líkamsþjálfun. Það hjálpar til við að draga úr þyngd, lækka blóðsykur og blóðþrýsting og bæta insúlín næmi, sem hjálpar til við að halda blóðsykri eðlilegum. Mælt er með 30-60 mínútna virkri hreyfingu a.m.k. 5 daga vikunnar.

2. Borða fjölbreytt hollt fæði í hæfilegum skömmtum á reglulegum tímum samkvæmt þörfum og brennslu. Hér má sjá ráðleggingar um næringu.

3. Borða trefjaríkt fæði. Það bætir blóðsykurstjórnun og dregur úr hungurtilfinningu sem minnkar líkur á þyngdaraukningu.

4. Velja heilkorn. Þau hjálpa til við að viðhalda eðlilegu blóðsykursgildi.

5. Losna við aukakílóin. Hvert gramm sem þú missir getur skipt máli. Sýnt hefur verið fram á aukna tíðni sykursýki hjá konum með mittismál yfir 81 cm og hjá körlum með mittismál yfir 94 cm vegna aukinnar insúlínmótstöðu.

Ef þú vilt fræðast meira um sykursýki 2 og þetta alverlega ástand er yfirgripsmikil umfjöllun í aprílhefti The Lancet (smellið hér).

                                                                  

        Heilsa framtíðar er í þínum höndum, gangi þér vel!

 

Heimildir:

WHO global health days :  World Health Day 2016: Beat diabetes. http;://www.who.int/campaigns/world-health-day/2016/en/

10 facts about diabetes (April 2016).  http://www.who.int/features/factfiles/diabetes/en/

Diabetes II, Mayo Clinic  http://www.mayoclinic.com/health/diabetes-prevention

Samtök sykursjúkra, www.diabetes.is

Hér er tengill á myndband um leyndarmál sykurs sem fróðlegt er að horfa á

 

Heilsuheilræði ehf.

Ásakór 3, #503
203 Kópavogur
Sími: 775 6677
heil@heil.is

Heilsufréttir

Vertu áskrifandi að nýjustu heilsufréttum frá okkur og fáðu hvatningu um heilsueflingu senda til þín án kostnaðar.

Skrá mig!